مع السلامه يامقفي على خير
حمدت خلاق العباد وشكرته
الصمت ابلغ من كبير المعاذير
وابلغ كلامي بالدموع اختصرته
ماصار صار ولاتفيد المحاذير
مديت لي جسر الفراق وعبرته
ماخفف الامي كثير المشاوير
من وين ماسجيت حبك ذكرته
اول احس الحب فيضة نواوير
واليوم كلمة حب صدق احتقرته
اضيق لامن سولفوا بالغنادير
ويطول ليل ٍ في غيابك سهرته
اللي جرى منك يفوق التصاوير
اقفيت بسنين الغرام ونكرته
رغم الرضى فيما قضى والمقادير
ياما عذلت القلب ياما قهرته
عشاني احمل لك موده وتقدير
كفنت قلبي في هواك وقبرته
تعبت اكافح قصة السر والبير
في غيبتك كل الاماني ذخرته
ان كنت راجع يالغلا بالتباشير
القلب في حبك مثل ماخبرته
وان كنت رايح ياعساها مسافير
وش عاد يعني خاطري لو كسرته
موضوع: الصمت أ بلغ )) 
الأربعاء مايو 06, 2009 5:54 am
